"நான் செல்லும் பாதை என்னைக் கோவிலின் சந்நிதானத்திற்கு இட்டுச் செல்வதற்குள் நான் களைப்படைந்து போய்விடலாம். ஆனால் நடந்து செல்கிற பாதை சுத்தமான பாதையாக இருந்துவிட்டாலே போதும். அப்போது வழி நெடுகிலும் கோவில்கள்தாம்; வழி நெடுகிலும் கோபுரங்கள்தாம்."

"ஒவ்வொரு மனிதனிடமும் வெளியில் தெரியாத சிறகுகள் இருக்கின்றன. ஆழ்ந்த நம்பிக்கைகள் சார்ந்த செயல்பாடுகள் மூலமே இந்தச் சிறகுகள் தம் இருப்பை வெளிப்படுத்துகின்றன. சுய செயல்பாடுகள் மூலமே நாம் மேலான கல்வியைப் பெறுகிறோம். இந்தக் கல்வி நம் சிறகுகளைக் கண்டுகொள்ள நமக்கு உதவுகிறது."

"இன்றைய சிக்கல் மிகுந்த வாழ்க்கையைப் பற்றிய அறிவு படைப்பாளிக்கு இருந்தால்தான் அவன் துல்லியமான சொற்களைத் தேடிச் செல்லும் முயற்சியையே மேற்கொள்ள இயலும்."

"சிந்தனைகள் கூர்மைப்படுத்தும் சமூகத்தில்தான் உணர்வுகளும் கூர்மைப்பட்டுச் செயல் உருவங்கள் வேகம் கொள்கின்றன. விவாதங்களும் முனைப்புக் கொள்கின்றன."

"காலம் சுற்றி வந்தாவது சத்தியத்தை முத்தமிடும் என்பது கலைஞனின் நம்பிக்கை. இவ்வுண்மை பொய்யென நிரூபிக்கப்பட்டாலும் அவன் தனது ‘மூட’ நம்பிக்கையிலேயே உறுதியாக நிற்பான்."

"‘இந்த மண்ணில் உன்னதங்கள் எதுவும் முளைக்காது’ என்று ஒரு விமர்சனப் பார்வை உண்டு. சகல உன்னதங்களையும் இந்த மண்ணில் முளைக்க வைக்க முடியும் என்ற நம்பிக்கை கொண்டவன் நான்."

"வாழ்க்கையின் சகல துறைகளிலும் உண்மையைத் தேடுவது அக்கினிப் பரீட்சைக்கு நம்மை ஆளாக்கிக்கொள்வதாகும்."

"தனக்கு ஏற்படக்கூடிய பெரும் பாதிப்பைப் பற்றிச் சிறிதும் கவலைப்படாமல் ஒருவன் எதிர் பேச முற்படும்போது அவன் பேச்சை நாம் கூர்ந்து கவனிக்க வேண்டும்."

"ஒவ்வொன்றையுமே நன்றாகப் பார்க்க அது அதற்கான இடைவெளிகள் வேண்டும். சில சமயம் காலத்தின் இடைவெளி. சில சமயம் தூரத்தின் இடைவெளி."